ગોરમા ગોરમા ગોરમા કરતા ગોરમાને પૂજવા જઈએ રે
ગોરમાને પૂજવા જઈએ મારી બેનો, ગોરમાની પૂજા કરીએ રે... ગોરમા ગોરમા...
કાચી માટીના ગોરમા બનાવીએ, કંકુ ચોખા ને ફૂલ સુગંધી,
ગોરમાને ચઢાવીએ રે... ગોરમા ગોરમા...
લાલ લીલી ચૂંદડી માને પહેરાવીએ, નાગલની માલા માને ધરાવીએ,
ગોરમાનું મુખડું મલકે છે... ગોરમા ગોરમા...
ધૂપ દીપ કરી માની આરતી ઉતારીએ, કથા કરીને માને પ્રસાદ ધરીએ,
ગોરમા રાજી રાજી થાય રે... ગોરમા ગોરમા...
ગોરમાની ભાવે ભક્તિ રે કરીએ, ભક્તિ કરીને માને રિઝાવીએ,
ગોરમાંના ગીતો ગાઈએ રે... ગોરમા ગોરમા... 

અંતર ઉભરાયા વિના હરિ નવ ઓળખાય
મન મેલા હોય તો ક્યાંથી દેખાય
મીરા તે બાઈના અંતર ઉભરાયા
ઝેર પીવાના આવ્યા છે દહાડા
દોડી દોડી વ્હાલો મારો ઝેર પીવા જાય છે (૨)
અહીંયા લીલા લહેર છે ને ઉપાધિ તો ઘેર છે
ઉપાધિ તો ઘેર છે ને અહીંયા લીલા લહેર છે... અંતર ઉભરાયા વિના...
નરસિંહ મેહતાના અંતર ઉભરાયા
મામેરા પુરવાના આવ્યા છે દહાડા
દોડી દોડી વ્હાલો મારો મામેરા પુરવા જાય છે (૨)
અહીંયા લીલા લહેર છે ને ઉપાધિ તો ઘેર છે
ઉપાધિ તો ઘેર છે ને અહીંયા લીલા લહેર છે... અંતર ઉભરાયા વિના...
દ્રૌપદી જીના અંતર ઉભરાયા
ચીર પુરવાના આવ્યા છે દહાડા
દોડી દોડી વ્હાલો મારો ચીર પુરવા જાય છે (૨)
અહીંયા લીલા લહેર છે ને ઉપાધિ તો ઘેર છે
ઉપાધિ તો ઘેર છે ને અહીંયા લીલા લહેર છે... અંતર ઉભરાયા વિના...
સકુ તે બાઈના અંતર ઉભરાયા
વાસીદા કરવાના આવ્યા છે દહાડા
દોડી દોડી વ્હાલો મારો વાસીદા કરવા જાય છે (૨)
અહીંયા લીલા લહેર છે ને ઉપાધિ તો ઘેર છે
ઉપાધિ તો ઘેર છે ને અહીંયા લીલા લહેર છે... અંતર ઉભરાયા વિના... 

આતમના આતમના અવિનાશી (૨)આવો ને હરિ (૨)
જય જય હો રંગીલા રણછોડ રાયા, આવી ચરણોમાં ગુણ ગાઉ તમારા... આતમના આતમના...
નરસૈયાની હૂંડી તમે સ્વીકારી
ભક્તોની આ નૈયા પાર ઉતારી
ડાકોરના ઓ વ્હાલા તું છે નિરધારી
બોડાણાની વેલ તમે હંકારી
ડાકોરના વાસી પાલનહાર, આવી ચરણોમાં ગુણ ગાઉ તમારા... આતમના આતમના...
વાત કરું છું તુજને મારા અંતરની
નિભાવી લેજે પ્રીત મારી ભવ-ભવની
લાગી લાગણી વ્હાલા તુજને મળવાની
રાખી તે તો લાજ તારા ભક્તોની
દયાળુ ઓ કાન્હા, તમે છો સહારા, આવી ચરણોમાં ગુણ ગાઉ તમારા... આતમના આતમના...
ભક્તો કહે છે આતો અરજી અમારી છે
સ્વીકારો ના સ્વીકારો મરજી તમારી છે
તવે આવી ઝોળી બિછાવી છે
દિલડાંની આ વાત દિલ માં સમાવી છે
કરું કાલાવાલા, નંદજી ના લાલા, આવી ચરણોમાં ગુણ ગાઉ તમારા... આતમના આતમના...

ધૂન:
હે.. રણછોડરાય ની મૂર્તિ કેરા દર્શનથી દુઃખ ભાગે છે (૨)
ચાલો જઈએ દર્શન કરવા ડાકોરમાં ઠાકોર બિરાજે છે રે વ્હાલા (૨) 

આવ્યો અધિક માસ સોહામણો, મારે હૈયે આનંદ ના સમાય, પુરુષોત્તમ પધારિયા
મેં તો શેરી વળાવીને સજ્જ કરી, મેં તો ફૂલડાં વેરાવ્યા સારી વાટ, પુરુષોત્તમ પધારિયા
હું તો ચીર ના ચંદરવા બંધાવતી, મેં તો પથરાવ્યાં લીલા પીળા લાલ, પુરુષોત્તમ પધારિયા
મેં તો દ્વારે દ્વારે તોરણ બાંધીયા, મેં તો મોતીના પૂર્યા છે ચોક, પુરુષોત્તમ પધારિયા
મેં તો કદલીના સ્થંભ રોપાવીયા, મેં તો દીવડા પ્રગટાવ્યા છે આજ, પુરુષોત્તમ પધારિયા
મેં તો કંચન થાળ કરે ગ્રહ્યા, મેં તો પ્રેમે વધાવ્યા મેં તો વધાવ્યા જદુરાય, પુરુષોત્તમ પધારિયા
મેં તો પ્રેમથી પ્રભુને પધરાવીયા, મારા આંગણિયા જળહળ થાય, પુરુષોત્તમ પધારિયા
મેં તો શણગાર ધરાવ્યા હરીને ભાવના, સેવા વિધિ કરી છે અપાર, પુરુષોત્તમ પધારિયા
મેં તો ભોગ ધરાવ્યા હરીને ભાવથી, મધુ મેવા વિવિધ પકવાન, પુરુષોત્તમ પધારિયા
મેં તો જારી ભરાવી યમુના જળની, આચમન કરોને ગોકુળનાથ, પુરુષોત્તમ પધારિયા
હું તો પાનના બિડલા બંધાવતી, મુખવાસ કરો ને વ્રજના નાથ, પુરુષોત્તમ પધારિયા
હું તો વ્હાલાને થાળ ધરાવતી, હું તો આરતી ઉતારું દીનાનાથ, પુરુષોત્તમ પધારિયા
સેવા સ્મરણ, કથા ને દર્શન પ્રભુ તણા, એ છે અધિક માસ ના વ્રત દાન, પુરુષોત્તમ પધારિયા
જે કોઈ અધિક માસ ના વ્રત પાળશે, તેને આંગણે પધારે હરિરાય, પુરુષોત્તમ પધારિયા
જે કોઈ પુરુષોત્તમનું ધ્યાન ધરશે, તેના ભવના ફેરા મટી જાય, પુરુષોત્તમ પધારિયા
શ્યામ મંડળ કહે છે કર જોડીને, નિત્ય લેજો પ્રભુજીના નામ, પુરુષોત્તમ પધારિયા 

ગંગા કાંઠે ખેતરા રે નમો નારાયણ, વાવજો જમણે હાથ રે હરિહર વાસુદેવા,
કૃષ્ણજી એ ખેતર ખેડિયા રે નમો નારાયણ, ખેડી છે કાશીની ભોમ રે, હરિહર વાસુદેવા
કૃષ્ણજીએ એ ખેતર વાવીયા રે નમો નારાયણ, વાવ્યા છે જવ ને તલ રે, હરિહર વાસુદેવા
કૃષ્ણજીએ એ સાથીડા રાખીયા રે નમો નારાયણ,રાખ્યા છે અર્જુન ભીમ રે, હરિહર વાસુદેવા
ખેતરે ખેતરે બળદિયા રે નમો નારાયણ, રાશ રણછોડજી ને હાથ રે, હરિહર વાસુદેવા
ધર્મ ને પાપ બે તોળીયા રે નમો નારાયણ, ત્રાજવા ત્રિકમને હાથ રે, હરિહર વાસુદેવા
ધર્મનું છાબડું ઊપડ્યું રે નમો નારાયણ, પાપનું ગયું પાતાળ રે, હરિહર વાસુદેવા
ધર્મને વૈકુંઠ ઢુંકડું રે નમો નારાયણ, પાપીને વેગળું દૂર રે, હરિહર વાસુદેવા
ધર્મની શેરી સાંકડી રે નમો નારાયણ, કૂંચી કેશવજીને હાથ રે, હરિહર વાસુદેવા
હરિએ દ્વાર ઊઘાડીયા રે નમો નારાયણ, આવ્યો છે સંતોનો સંગ રે, હરિહર વાસુદેવા
આવો બાઈઓ ને બેનો બેનડી રે નમો નારાયણ, સુણો કળિયુગની વાત રે, હરિહર વાસુદેવા
કળિયુગ કડવો લીમડો રે નમો નારાયણ, મીઠા છે સ્વર્ગના દ્વાર રે, હરિહર વાસુદેવા
ગાય શીખે ને સુણે સાંભળે રે નમો નારાયણ, એનો હોજો વૈકુંઠમાં વાસ રે, હરિહર વાસુદેવા 

આ કાળા તો ધોળા થયા, મારા દીકરા તો વહુના થયા
દીકરીને જમાઈ લઇ ગયા, મારા ઘડપણ ના બેહાલ થયા (૨)
તો ઉભો કહેતામાં ઉભો થઇ જાય એવો પ્રીતમ મુજને પ્યારો છે
હની હની કહી મને બોલાવે એવો હસબન્ડ પણ મને વ્હાલો છે (૨)
વહુ બેટા બેટા કહી મને બોલાવે એવા સસરા પણ મને પ્યારા છે
સવાર સાંજની રસોઈ કરે ને મને જમાડે એવા સાસુ પણ મને વ્હાલા છે (૨)

જમાનો જમાનો કેવો રે આવ્યો જમાનો,
જોયો ના જોવાય આવ્યો જમાનો
કાને ના સંભળાય આવ્યો જમાનો,
જમાનો જમાનો નવી ફેશન નો જમાનો
હે.. નવા જમાનાની નવી વહુઓ રોજ રોજ બ્યુટી પાર્લર માં જાય... એ હા બેન હા...
નવા નવા નખરા કરે, ટૂંકા ટૂંકા કપડાં પહેરે,
એતો માને ના કોઈનું જરાય આવ્યો જમાનો... જમાનો જમાનો...
હે... આજના જુવાનિયા કોલેજીયનો ને વ્યસન ફેશનમાં ફસાય... એ હા બેન હા...
નવી નવી બાઈક રાખતા, નવા ફેશનના મોબાઈલ રાખતા
પણ ખિસ્સા ખાલી જણાય આવ્યો જમાનો... જમાનો જમાનો...
હે... આ પત્ની મેચિંગ બહુ કરે પણ પેલા પતિને મેચ ના થાય...
ઘરના ધણીને રોજ ધમકાવતી, એતો ઘરની રાણી બની જાય આવ્યો જમાનો... જમાનો જમાનો...
હે... આ બેનો વાળ કપાવતી અને પેલા ભાઈઓ વધારે વાળ... એ હા બેન હા...
હૂતો હુતી ફરવા ગયા, પેલા હુતાના કેડમાં બાળ આવ્યો જમાનો... જમાનો જમાનો...
હે... આ સાસુ વહુને બને નહિ ને રોજ ઝગડા વધતા જાય... એ હા બેન હા...
આ છોકરાઓ વહુઘેલા થયા, પછી માં-બાપથી જુદા થાય આવ્યો જમાનો... જમાનો જમાનો...
હે... સાચા સંત ઓળખાય નહિ ને નકલી બહુ પૂજાય... એ હા બેન હા...
પૂજારી વેપારી બન્યા, પછી મંદિર દુકાન બની જાય આવ્યો જમાનો... જમાનો જમાનો...
હે... આ હળાહળ કળિયુગ આવીયો ને એનું વર્ણન કદી ના થાય... એ હા બેન હા...
ના બનવાનું બની રહ્યું, ના કહેવાય ના સહેવાય આવ્યો જમાનો... જમાનો જમાનો...
હે.. તેમ છતાં આ કળિયુગમાં ફાયદો એકજ ગણાય... એ હા બેન હા...
આ યુગમાં રોજ ભજન કરવાથી, હરિનામથી પાર ઉતરાય આવ્યો જમાનો... જમાનો જમાનો...

ધૂન:
હે.. શ્રીખંડ પુરીના જમણ ઉપર ચટણી નથી તો કાઈ નથી..
લાખો રૂપિયા હોય ઘરમાં પણ પત્ની નથી તો કાઈ નથી..